Предлог Законот за Средно стручно образование е изготвен од страна на работна група и истиот следната недела ќе биде достапен на владиниот ЕНЕР систем, со цел сите заинтересирани чинители да дадат свој придонес кон креирање на  најдоброто законско решение,  согласно определбата на МОН за транспарентно и отчетно работење, а истовремено за изготвување на модерна и европска легислатива за дефинирање на стручното  образование и обука во земјава.

 

За да се овозможи стручно образование кое ќе соодејствува на пазарот на трудот, со предложениот Закон се уредува концептот на дуално образование, а се прецизираат и одредбите кои се однесуваат на практичното образование, особено стекнато кај познат работодавач, сé со цел да се зголеми неговиот обем и квалитет.

 

Преку решенијата предвидени во законот се врши рационализација на ресурсите на системот на стручно образование, а со цел надминување на проблемите кои произлегуваат од фрагментацијата и дезинтеграцијата на установите за стручно образование и обука, кои досега ги земаа во предвид тесно локалните потреби, а не регионалните. Земајќи ја во предвид централната координативна улога која ја има Центарот за стручно образование и обука, кој се трансформира во Центар за развој на стручно образование, соодветно се интервенира и во неговите надлежности, за да може најдобро да одговори на новите задачи кои му се доверуваат.

 

Покрај Предлог-законот за стручно образование и обука, МОН преку посебна работна група изготви и нов Закон за средно образование. Покрај бројните нови права и можности за учесниците во воспитно – образовниот процес во средните училишта, централно место во процесот на креирање на истиот е ангажирањето на образовните асистенти, по истиот принцип како и кај основните, односно тие да бидат вклучени во наставниот процес како лица вработени во училиштата, а не како што досега беше пракса, истите да бидат ангажирани преку проекти или на товар на родителите на учениците со атипичен развој.

 

Предлог – законот за средно образование наскоро ќе биде објавен на ЕНЕР системот и достапен за дополнителни сугестии од страна на заинтересираните граѓани, институции, граѓански организации и здруженија.

МОН изразува благодарност до сите учесници во процесот на креирање на законските решенија како ДИЦ, БРО, ЦССО, средните училишта, меѓународните партнери УНДП, УСАИД, ОБСЕ, Владата на Швајцарија преку проектот „Образование за вработување во Северна Македонија - Е4Е@MK и стопанските комори и ги охрабрува сите останати да дадат свој придонес во усвојувањето на најдобрите верзии.