Министерката за образование и наука проф. д-р Весна Јаневска на 25 март 2025 година со Решение го донесе документот Ревизија на Патоказот за истражувачка инфраструктура на Република Северна Македонија 2022-2024.
Првата верзија на Патоказот за истражувачка инфраструктура (ИИ) е донесен и објавен на веб страната на Министерството за образование и наука на почеток на 2022 година. Податоците во Патоказот датираат од 2021 година кога траеше процесот на анализа и собирање податоци за мапирање на опремата. Временскиот период од над 3 години значи и промена на состојбата и фактичката ситуација на опремата и лабораториите. Поради тоа Министерството за образование и наука пристапи и отпочна со ревидирање на Патоказот на крај на 2024 година со примена на два методи на истражување: анализа на стратешки документи и истражување на терен.
Со ревизијата ќе се обезбедат значајни податоци за Министерството за образование и наука бидејќи ќе се добие преглед на состојбата на лабораториите врз основа на што ќе се предвидат идните вложувања на јавни средства како и стратешки правци за приклучување кон меѓународни истражувачки инфраструктури. Анализата на постојната состојба и севкупната моментална истражувачка инфраструктура со која располага земјата е основа за изготвување на Нов патоказ за истражувачката инфраструктура поврзан со целите и приоритетите на Стратегијата за паметна специјализација со изготвен Акциски план кој ќе содржи конкретни активности и мерки, период на реализација, временски рокови, надлежни институции и потребни финансиски средства за развој на инфраструктурата.
Имајќи ја предвид улогата на научното истражување врз севкупниот развој на државата, оценувајќи го суштински значајно финансирањето на проекти за развој на лабораториски ресурси како област од посебен и јавен интерес, преку воведување на систем за финансирање за поддршка за развој на лабораториски ресурси и за таа цел обезбедување на поголема распределба на буџетот за истражување и развој што би стимулирале поголеми инвестиции во истражувачки активности, во 2021 година, на веб страната на Министерството за образование и наука беше распишaн Конкурс за финансирање на научно-истражувачки проекти од посебен и јавен интерес за 2021 година (поддршка за развој на лабораториски ресурси) кои беа финансирани во периодот 2021, 2022 и 2023 година. Во прилог на Ревизијата на Патоказот за истражувачки инфраструктури 2022-2024 е даден преглед на лабораториската опрема набавена со овој Конкурс.
