Врз основа на член 45 став (6) од Законот за основното образование („Службен весник на Република Северна Македонија“ бр. 161/19 и 229/20) и Правилникот за формата и содржината на образецот на барањето за покривање на трошоците за котизација и пат за учество на еден меѓународен натпревар од областа на математиката, информатиката и природните науки („Службен весник на Република Северна Македонија“ бр. 49/20), Министерството за образование и наука објавува
Ј А В Е Н П О В И К
за покривање на трошоци за котизација и пат за учество на еден меѓународен натпревар во текот на 2023 година од областа на математиката, информатиката и природните науки
1. Услов за учество
На Јавниот повик за покривање на трошоци за котизација и пат за учество на еден меѓународен натпревар во текот на 2023 година од областа на математиката, информатиката и природните науки може да поднесат барање акредитирани здруженија на наставници за организирање на натпреварите на учениците од основните училишта од страна на Министерството за образование и наука.
Под меѓународен натпревар се подразбира натпревар на кој учествуваат ученици од најмалку десет различни држави, на кој се споредуваат знаењата помеѓу учениците од различните држави и се врши рангирање на најдобрите ученици од сите земји кои учествуваат на меѓународниот натпревар.
Министерството за образование и наука за 2023 година ќе ги покрие трошоците за учество (котизација и пат) на еден меѓународен натпревар од областа на математиката, информатиката и природните наука, за најмногу шест ученици и најмногу три ментори, чија бројка зависи од правилата на организаторите на меѓународниот натпревар, како и во согласност со расположивите средства во Буџетот на Министерството за образование и наука.
2. Начин, потребна документација и рок на пријавување
Акредитираното здружението на наставници, до Министерството поднесува барање со следната документација во прилог и тоа:
- Решение за акредитација на здружението на наставници за организирање на натпревари за општинско, регионално и државно ниво,
- Известување за извршен избор на учениците кои ќе учествуваат на меѓународниот натпревар и податоци за истите,
- Известување за ментори на учениците кои ќе учествуваат на меѓународниот натпревар и податоци за истите,
- Известување од организаторот на меѓународен натпревар за висината на котизацијата за учество на натпреварот,
- Пресметка за висината на патните трошоци, и
- Доказ (потврда, покана, електронски сајт и друго) за правилата на организаторите на меѓународниот натпревар каде се наведени правилата за учество на меѓународниот натпревар, меѓу кои и податокот за бројот на учесници на секоја делегација.
Барањето со прилог документите може да се доставуваат секој работен ден до Министерството за образование и наука (во писарницата на Министерството за образование и наука) или преку пошта на следната адреса: бул. „Св.Кирил и Методиј“ бр. 54, 1000 Скопје, со назнака „Јавен повик за покривање на трошоци за котизација и пат за учество на еден меѓународен натпревар во текот на 2023 година од областа на математиката, информатиката и природните науки“, најдоцна до 31.10.2023 година.
