Она што нема да го документираме денес, ризикуваме да го изгубиме утре. Затоа, зачувувањето на културното наследство е заедничка одговорност и значајна инвестиција во нашиот идентитет и иднина, истакна заменик министерот за образование и наука Дритон Сулејмани на научната тркалезна маса посветена на албанското културно наследство во кумановскиот регион, организирана од Институтот за духовно и културно наследство на Албанците - Скопје, под раководство на д-р Бесник Емини.
- Како граѓанин на Куманово, оваа тема за мене има посебно значење, бидејќи наследството на овој регион е дел од нашиот идентитет, нашата историја и сеќавањата што треба да им ги пренесеме на идните генерации, додаде Сулејмани, напоменувајќи ја важноста на научното истражување, документирањето и промовирањето на културното наследство, како и улогата на образованието во запознавањето на младите со историјата, јазикот, традициите и вредностите што ги наследуваме од нашите предци.
- Овој проект, поддржан од Министерството за образование и наука, ја потврдува нашата посветеност на развојот на науката и зачувувањето на нашите национални вредности. Министерството и во иднина ќе продолжи да поддржува вакви иницијативи, кои придонесуваат за збогатување на знаењето и зачувување на нашето наследство за идните генерации, изјави заменик министерот за образование и наука Дритон Сулејмани.
