Европската фондација за обука (ЕТФ) за земјите од Западен Балкан организираше студиска посета на Финска „Collaborative Futures: Western Balkans Peer Learning Visit“, на која се разменуваа искуства за управување, интернационализација и развој на образованието базиран на иновации.
Делегацијата од Македонија ја предводеа претставници на Министерството за образование и наука, а во состав беа и претставници на ИНОВА и универзитетски професори.
Студиската посета започна со средба во финското Министерство за образование и култура и Финската национална агенција за образование, а потоа беа посетени повеќе водечки фински образовни и иновациски институции - Централна библиотека “Ооди” во Хелсинки (Oodi Helsinki Central Library), Стручен колеџ во Хелсинки Stadin AO (Helsinki Vocational College), Метрополиа Универзитет за применети науки (Metropolia University of Applied Sciences), Универзитет во Хелсинки (University of Helsinki), Терко Здравствен хаб (Terkko Health Hub), Инкубатори за претприемништво во Хелсинки (Helsinki Incubators), Услуги за иновации во Хелсинки (Helsinki Innovation Services) и Универзитет ЛУТ во Коувола (LUT University, Kouvola).
Посетата претставуваше значајна можност за зајакнување на меѓународната соработка, размена на знаења и разгледување на идни заеднички иницијативи во областите на образованието, иновациите, претприемништвото и трансферот на технологии.
Министерството за образование и наука останува посветено на поддршка на меѓународни партнерства и иницијативи кои придонесуваат кон развој на современ, инклузивен и иновациски ориентиран образовен екосистем.
