Крајот на едно истражување не претставува само формално заокружување на определен научен процес, туку тоа нуди можност за критичка евалуација на постигнатите резултати, затворање на одредени прашања и утврдување на насоки за идни истражувања.
Ова го истакна Елена Ивановска, државен секретар во Министерството за образование и наука на денешната конференција на Институтот за национална историја, организирана по повод заокружување на проектот „Извори на историјата во Македонија - тематска целина религија“.
Истражувањето кое беше спроведено од страна на Институтот за национална историја, е посветено на историските аспекти на религијата и нејзиното значење во општествениот, културниот и духовниот развој на нашиот народ.
- Вие историчарите и натаму ќе имате многу работа, од која знам дека не се плашите и дека ќе продолжите да се заложувате за максимално ефективно да ја извршувате, а ние како институции, зборувам за Министерството за образование и наука и за Владата, се разбира дека ќе продолжиме да Ве поддржуваме. Горди сме на Вас, затоа што ја пренесувате на светот вистинската историска рамка за постоењето на Македонија и македонскиот народ, изјави Ивановска.
Таа, напомена, дека минатата 2025 година беа финансирани 50-тина научно-истражувачки проекти од јавен интерес, на јавните научни и високообразовни установи, на Македонската академија на науките и уметностите и на бизнис заедницата во вкупна вредност од 6 милиони евра, а меѓу нив е овој проект на Институтот за национална историја е еден од нив.
- Убедена сум дека направивме добра работа. Ја раздвиживме науката, која во минатото беше запоставена. Ги стимулиравме нашите истражувачи и научни работници и така - заедно придонесуваме за развојот на научно – истражувачката мисла во Македонија. Пари за наука и понатаму ќе има, затоа што сме свесни дека без наука и образование, нема ниту развој на државата, додаде државниот секретар Ивановска.