Во демократски општества, секое училиште треба да биде училиште на демократија. Наставниците имаат клучна улога да ги воспитуваат младите генерации во духот на почитување на човековото достоинство, правата и еднаквоста. Ова е наша стратешка определба, посочи заменик министерот за образование и наука Дритон Сулејмани на Конференцијата за отпочнување на втората фаза од проектот „Квалитетно образование за сите–Градење демократска отпорност“.
Проектот има за цел да ја промовира демократијата и човековите права во образованието. Во соработка со Министерството за образование и наука, го имплементира Советот на Европа, а го финансира Сојузна Република Германија.
Референтната рамка на компетенции за демократска култура, развиена од Советот на Европа, е клучна алатка за интеграција на демократските вредности во образовните системи, рече заменик министерот Сулејмани, додавајќи дека врз основа на тој документ e креирана новата Национална стратегија за образование 2026-2032, и е наменета за наставниците од предучилишно сé до високо образование, вклучувајќи ги и образованието за возрасни и стручното образование. Овозможува систематски пристап во планирањето на наставата, учењето и оценувањето на компетенциите за демократска култура што ги стекнале учениците.
„Првата фаза од проектот „Квалитетно образование за сите“ беше од голема помош во подготовката на новата Национална стратегија и во креирањето на политики засновани на факти. Преку Мапинг извештајот и 21. препорака добивме јасни насоки за унапредување на демократското граѓанско образование, зајакнување на инклузивноста и мултикултурноста, како и развивање партиципативно управување со училиштата“, нагласи Сулејмани.
Се заблагодари на партнерите и училиштата што се дел од проектот и наведе дека сите чинители заедно можат да изградат образование што ги учи младите да бидат одговорни граѓани, да ги почитуваат различностите и да бидат градители на праведно, инклузивно и одржливо општество.
Втората фаза од Проектот „Квалитетно образование за сите – Градење демократска отпорност“ е насочена кон имплементација на Националната стратегија за образование и создавање мрежа на училишта што ќе бидат двигатели на демократска култура и ќе овозможи наставниците да разменуваат добри практики, а учениците да ги развиваат и да ги применуваат компетенциите за демократска култура.
Заменик министерот Сулејмани укажа дека Македонија е држава која интензивно работи на усогласување со европските стандарди и вредности. За таа цел се градат институции што гарантираат демократија и владеење на правото. Образованието има суштинска задача да формира граѓани кои критички размислуваат и ги отфрлаат популистичките и екстремистичките импулси, со што демократијата ќе стане силна и стабилна одвнатре.
