Заменик министерот за образование и наука Дритон Сулејмани се обрати на отворањето на регионалниот проект „VET2WORK – Усогласување на стручното образование и обука со потребите на пазарот на трудот“, како и на Првиот регионален политички дијалог, во Драч, Република Албанија. На настанот учествуваше и директорот на Центарот за развој на стручното образование Бесник Зендели.
Проектот е поддржан од Австриската агенција за развој (ADA) и Австриската агенција за образование и интернационализација (OEAD), и има за цел да ги зајакне системите за стручно образование и обука (СОО) во Македонија, Албанија, Косово и Црна Гора, со посебен фокус на туризмот и земјоделството.
Сулејмани ја нагласи важноста на зајакнувањето на стручното и дуалното образование, проширувањето на практичната обука во компаниите и создавањето посилни партнерства меѓу стручните училишта и бизнис-секторот. При тоа, посебно внимание посветуваме на развојот на дигиталните и зелените компетенции, како и на создавањето еднакви можности за сите млади, особено за девојките и младите од руралните средини.
„Силно верувам дека стручното образование не треба да се смета за избор од втор ред, туку како важен пат кон професионален успех, вработување и економски развој“, рече заменик министерот Сулејмани, додавајќи дека преку регионална соработка и меѓународни партнерства создаваме повеќе можности за младите генерации и обезбедуваме квалификувани кадри, во согласност со потребите на современата економија.
Инвестирањето во вештините на младите е инвестиција во иднината на нашата држава.
