Националното координативно тело за реформи во високото образование ги разгледа нацрт верзиите на двата клучни закони за обезбедување европски академски стандарди и повисок квалитет на нашето високо образование - Законот за високото образование и Законот за квалитет во високото образование.
Министерката за образование и наука Весна Јаневска посочи дека поголемиот дел од членовите на ова тело учествуваа во текот на целиот процес на подготовка на законите а заедно со Министерството се прави финална проценка на одредбите пред законите да бидат јавно објавени и да се даде можност и другите засегнати и заинтересирани чинители да придонесат за подобрување на регулативата.
Националното координативно тело за реформи во високото образование за прв пат го формираше актуелната Влада со цел академските институции да продуцираат кадри со високи компетенции, применливи знаења и истражувачки резултати со меѓународно признат квалитет.
Министерката Јаневска се заблагодари за ангажманот и конструктивноста на сите членови на координативното тело, укажувајќи дека нивната работа е одраз на висока општествена одговорност и искрена заложба за развој на образованието.