Mësimdhënësit janë magjistarë të vërtetë - jo vetëm për sa i përket njohurive që përcjellin, por edhe në formësimin e karakterit dhe zhvillimit të fëmijëve në tërësi. Ata i inkurajojnë të mendojnë me guxim, të udhëhiqen nga vlerat dhe të përgatiten për një botë plot sfida. Por, që të kenë sukses, është e domosdoshme mbështetja dhe bashkëpunimi me familjet dhe komunitetin. Kjo u theksua në panel diskutimin e sotëm "Magjia e krijimit të individëve të guximshëm, të menduar dhe të ndjeshëm " në kuadër të fushatës kombëtare "Magjia është në dije" të Ministrisë së Arsimit dhe Shkencës, e cila u mbajt në Strumicë.
Mësimdhënësit, prindërit dhe profesionistët shkëmbyen ide, praktika të mira dhe përvoja se si të krijojnë kushte për të inkurajuar zhvillimin e përgjithshëm të fëmijëve që në moshë të hershme.
Në pjesën e parë të panel diskutimit morën pjesë ministrja e Arsimit dhe Shkencës, Prof. Dr. Vesna Janevska, Ana Vitanova - Ringaçeva, profesor i asociuar në Katedrën e Gjuhës dhe Letërsisë Maqedonase në Fakultetin e Filologjisë në Universitetin "Goce Delçev" në Shtip, dhe Stojne Miteva, psikologe dhe terapiste gestalt në ShMK "Marshall Tito" - Murtinë, Strumicë.
Ministrja Janevska theksoi se pikërisht mësuesit kanë ndikimin kyç në zhvillimin e fëmijëve dhe potencoi se roli i tyre është të inkurajojnë potencialin dhe t'i ndihmojnë të rinjtë të bëhen individë të guximshëm, mendimtarë dhe të ndjeshëm.
“ Kur mësimdhënësi i jep fëmijës hapësirë të shprehet, të pyesë dhe të hulumtojë, atëherë ndodh magjia e vërtetë, atëherë rritim gjenerata që besojnë në vete dhe në fuqinë e dijes", theksoi ministrja.
Në pjesën e dytë të panelit, përvojat dhe mendimet e tyre i ndanë Trajçe Bjadov, mësimdhënës i gjuhës maqedonase në SHFK “Geras Cunev” – Prosenikovë, Strumicë; Arhelos Turanov, drejtor në SHMSH QRAPT “Nikolla Karev” në Strumicë; dhe Meri Donevska Kosturanova, prind dhe kryetar i Këshillit të prindërve në SHMK “Jane Sandanski” në Strumicë. Të gjithë ranë dakord se zhvillimi i të menduarit kritik, guximit dhe dhembshurisë që në moshë të re janë kyçe në ndërtimin e personalitetit dhe theksuan se këto nuk formohen përmes një ligjërate të vetme, por përmes mbështetjes së përditshme dhe të kujdesshme nga mësimdhënësit dhe prindërit.
Paneli i sotëm konfirmoi se kur njohuritë dhe përkushtimi i mësimdhënësve kombinohen me mbështetjen nga komuniteti dhe prindërit, krijohet themel i fortë për të ardhmen, gjegjësisht për brezat që janë të sigurt në vetvete, me aftësinë për të menduar në mënyrë kritike dhe empatikë.
Paneli u realizua në kuadër të fushatës kombëtare “Magjia është në dije”, e dedikuar për njohjen dhe mbështetjen e profesionit të mësimdhënësit si forcë shtytëse e përparimit shoqëror.