Ministria e Arsimit dhe Shkencës i ka përmbushur objektivat e programit të punës për vitin 2025, si dhe pjesë të indikatorëve të Planit të Rritjes për vendet e Ballkanit Perëndimor-janë miratuar formula të reja për financimin e arsimit fillor dhe të mesëm, është siguruar pajisje moderne dhe e sigurt për teknologjinë informatike dhe komunikimit për shkollat fillore dhe është arritur shifra prej 700 kompani të angazhuara në realizimin e arsimit dual dhe të mësimit përmes punës.
Këtë e theksoi sekretari shtetëror në Ministrinë e Arsimit dhe Shkencës, Elena Ivanovska, në takimin e sotëm të shtatëmbëdhjetë të Grupit Sektorial të Punës për Arsim, Punësim dhe Politikë Sociale, ku përfaqësues të tre Ministrive resore informuan për rezultatet e arritura përgjatë gjashtë muajve të kaluar.
„ E shfrytëzuam mirë buxhetin për vitin 2025, i cili është rekord në shumë prej 38 miliardë denarë, dhe veçanërisht gëzon fakti që për vitin e ardhshëm me shumë gjasa do të marrim edhe më shumë fonde, 40 miliardë denarë, me të cilat do të vazhdojnë ndryshimet pozitive të nisura në arsim,” tha Ivanovska.
Ajo rikujtoi për investimet në infrastrukturën arsimore, për futjen e mësimit me një turn të vetëm dhe faktin që janë siguruar tekste shkollore për të gjithë nxënësit, disa prej të cilave janë krejtësisht të reja dhe të përpiluara në përputhje me programet e reja mësimore , duke veçuar tekstet shkollore për të gjitha gjuhët e huaja që kanë munguar prej shtatë vitesh.
“ Që nga ky vit shkollor kemi sistem arsimor më gjithëpërfshirës. Janë angazhuar numër më i madh i asistentëve arsimorë deri tani në arsimin fillor – gjithsej 1,346, ndërsa për herë të parë 130 në shkollat e mesme. Shkollat e mesme speciale u bënë shkolla shtetërore me qendra burimore dhe ndihmojnë të gjithë të tjerët ku ka nxënës me nevoja të veçanta arsimore. Kapacitetet e tyre më parë nuk ishin shfrytëzuar, por ne i kemi rikthyer funksionin duke mundësuar që prindërit, së bashku me komisionin profesional sipas KFM-së, të vendosin nëse do t’i regjistrojnë fëmijët në shkollë të rregullt apo të veçantë,” tha Ivanovska.
Pagat e mësimdhënësve në shkolla janë rritur me 12%, ndërsa në institucionet e arsimit të lartë me 14%. Inteligjenca artificiale ka hyrë në mësimdhënie, për të cilën është përgatitur udhëzues për mësimdhënësit,bashkëpunëtorët profesionalë dhe nxënësit, ndërkohë që organizohen trajnime për kuadrin në shkolla në këtë temë. Që nga shtatori filloi zbatimi i ditarit elektronik të ri, i cili ka reduktuar detyrimet administrative për mësimdhënësit.
Ivanovska informoi se kontrolli i cilësisë së arsimit rezultoi me mbylljen e 14 instituteve të pavarura shkencore dhe një fakulteti. Janë miratuar 5 zgjidhje të reja ligjore, ndërsa aktualisht po punohen dy të tjera – për arsimin e lartë dhe për aktivitetet kërkimore-shkencore.
Për realizimin e projekteve kërkimore-shkencore të rëndësishme për shtetin dhe në përputhje me Strategjinë për Specializimin Intelegjent janë ndarë 374 milionë denarë, dhe Maqedonia u bë partner me Qendrën e Përbashkët të Kërkimit të Komisionit Evropian, e cila hapi dyert për shkencëtarët dhe hulumtuesit tanë. Bazat e literaturës dhe punimeve shkencore Web of Science dhe Scopus u bënë të disponueshme falas për të gjithë punonjësit dhe studentët e universiteteve shtetërore.
„Kemi përgatitur Strategji të re për arsim me vlefshmëri nga 2026 deri në 2032, e cila do të sigurojë vazhdimësinë e ndryshimeve pozitive që i kemi nisur vitin e kaluar. Që nga dje, ajo është në sistemin ENER dhe presim komentet e opinionit,” theksoi Ivanovska.