Një nga kushtet themelore për arsim cilësor është që të kemi infrastrukturë të mirë arsimore - shkolla të mira me kabinete të pajisura, qasje në pajisje IT dhe internet të sigurt si dhe objekte të përshtatura për gjithpërfshirjen e fëmijëve me nevoja të veçanta arsimore. Ky është prioritet i Qeverisë aktuale dhe Ministrisë, dhe për dy vjet kemi investuar 70 milionë euro në mbi 90 projekte infrastrukturore.
Këtë sot e theksoi ministrja e Arsimit dhe Shkencës, Prof. Dr. Vesna Janevska, duke u përgjigjur pyetjeve të deputetëve në Kuvend lidhur me atë ç'farë është bërë për përmirësimin e infrastrukturës arsimore në Maqedoni gjatë mandatit të Qeverisë aktuale.
„ Vetëm përmes Ministrisë, kemi investuar 35 milionë euro në 7 objekte të reja shkollore, 4 salla të reja sportive, në rindërtimin e 30 objekteve ekzistuese shkollore dhe sportive, në rikonstruimin e dy konvikteve studentore, si dhe kemi zhbllokuar ndërtimin e FINKI-t dhe FKF-së, të cilat ishin ndërprerë në mënyrë të padrejtë. Përveç kësaj, Qeveria, përmes dy thirrjeve për financimin e investimeve kapitale, komunave i'u ndau 35 milionë euro për realizimin e 55 projekteve", u shpreh Janevska.
Ministrja gjithashtu rikujtoi se për shkak të futjes së konceptit të mësimdhënies me një ndërrim, zgjerohen kapacitetet e 14 shkollave në Qendër, Karposh, Aerodrom, Gjorçe, Butel, Gazi Babë, Kisella Vodë, Ilinden dhe Gradsko, ndërsa 15 projekte të tjera do të fillojnë në faza gjatë disa muajve të ardhshëm.
„ Do të ndërtojmë edhe 30 salla të reja sportive, ndërsa do ti rikonstruktojmë konviktet e tjera shtetërore të studentëve dhe gjashtë shkolla me qendra burimore. Mjetet tashmë janë siguruar”, informoi ministrja, duke theksuar se është e lehtë të krahasohen rezultatet e punës së Qeverisë aktuale të arritura për dy vjet dhe siç tha ajo, mosveprimi i atyre që ishin në pushtet në shtatë vitet e mëparshme, si dhe ata që nuk patën kurrë mundësi të menaxhonin institucionet, dhe janë gjithmonë ndër kritikët më të zëshëm.