Gjuha rome është pjesë e pasurisë sonë të përbashkët kulturore dhe, përmes arsimit, bëhet pjesë e trashëgimisë sonë të përbashkët që kemi detyrë dhe kënaqësi ta ruajmë dhe ta kultivojmë. Urime të gjithë bashkëqytetarëve tanë me kombësi rome me rastin e Ditës Botërore të Gjuhës Rome. U dëshiroj përjetësi këtij simboli më të rëndësishëm të identitetit dhe u përcjell mesazhin se Maqedonia i respekton dhe gjithmonë do t’i mbështesë në përpjekjet për ruajtjen dhe zhvillimin e kulturës dhe identitetit të tyre, theksoi ministrja e Arsimit dhe Shkencës, Vesna Janevska, në shënimin e Ditës Botërore të Gjuhës Rome –5 Nëntor.
Ministria e Arsimit dhe Shkencës punon vazhdimisht për avancimin e arsimit të komunitetit rom dhe për krijimin e kushteve për mësim të qëndrueshëm, promovim dhe mbrojtje të gjuhës rome. Në këtë drejtim, këtë vit janë bërë hapa të rëndësishëm përpara.
„ Është nder për mua që personalisht kam udhëhequr ndryshimet që janë bërë dhe përderisa drejtoj këtë dikaster, do të vazhdoj të pranoj iniciativa reale dhe të zbatueshme. Me ndryshimet në legjislacion kemi mundësuar që nxënësit të mësojnë lëndën zgjedhore „Gjuha dhe kultura e romëve“ edhe në grupet më të vogla se 15 nxënës, gjë që më parë nuk ishte praktikë. Në këtë mënyrë, krijojmë mundësi reale që çdo fëmijë që dëshiron të mësojë gjuhën rome të mund ta bëjë pa kufizime,” theksoi Janevska, duke shtuar se përmes sigurimit të materialeve moderne mësimore, gjuha rome kultivohet që nga mosha më e hershme.
Ministria e Arsimit dhe Shkencës ka rritur numrin e mediatorëve arsimorë rom në arsimin fillor nga 40 në 50, ndërsa për herë të parë janë futur edhe në arsimin e mesëm, ku më parë mungonin, ndërsa kanë rol të rëndësishëm në ndërtimin e urave midis nxënësve, shkollave dhe prindërve. Këtë vit është rritur edhe kuota e bursave për nxënës dhe studentë romë – për rreth 300 bursa.
“Këto janë masa që burojnë nga Strategjia Kombëtare për Romët dhe nuk përfaqësojnë vetëm aktivitete afatshkurtra, por politika publike të qëndrueshme që përforcojnë barazinë dhe gjithëpërfshirjen në sistemin tonë arsimor. Me të njëjtin respekt dhe politika vazhdojmë edhe në periudhën e ardhshme, sepse komuniteti rom është pjesë e shoqërisë sonë të përbashkët dhe ka kontribut në zhvillimin e saj. Nëse e përforcojmë arsimin e romëve, e forcojmë edhe fuqinë e komunitetit dhe rolin e tij shoqëror,” theksoi ministrja e Arsimit dhe Shkencës, Janevska.