Ministria e Arsimit dhe Shkencës dhe Byroja për Zhvillimin e Arsimit organizojnë debat publik për listën e re propozim -lektyra shkollore për arsimin fillor dhe dërgojnë ftesë për të gjitha palët e interesuara – mësimdhënësit, shërbimet profesionale dhe faktorët e tjerë në arsim – që të përfshihen në mënyrë aktive në përcaktimin e listës së lektyrave bashkëkohore, gjithëpërfshirëse dhe cilësore, e cila do t’u përgjigjet nevojave reale të nxënësve dhe procesit mësimor.
Nevoja për përditësimin e listës së lektyrave shkollore rjedh nga synimi për harmonizimin e vazhdueshëm të përmbajtjeve mësimore me qëllimet bashkëkohore arsimore, me karakteristikat zhvillimore të nxënësve dhe me kontekstin e tyre shoqëror dhe emocional.
Propozim-lista është hartuar mbi bazën e listës që është zbatuar në procesin mësimor nga viti shkollor 2019/2020. Disa tituj janë hequr për shkak të lexueshmërisë së ulët, mospërshtatjes me moshën ose përmbajtjen. Për shkak të ndryshimeve në programet mësimore dhe lidhjeve ndërdisiplinore në mësimdhënie, disa vepra janë bartë në klasë tjetër ose kanë marrë status të ri – nga të detyrueshme janë bërë zgjedhore dhe anasjelltas.
Në propozim janë përfshirë vepra që trajtojnë tema bashkëkohore dhe me rëndësi, ndër të cilat: identiteti dhe vetëbesimi, miqësitë dhe marrëdhëniet ndërnjerëzore, jeta shkollore dhe bullizmi, sfidat emocionale dhe psikologjike, diversiteti kulturor dhe gjithëpërfshirja e fëmijëve me nevoja të veçanta arsimore.
Qëllimi është që nxënësit të lexojnë përmbajtje që janë të afërta me realitetin e tyre, por mjaft të shtresuara për analizë dhe interpretim simbolik, të cilat do të nxisin të menduarit kritik, diskutimin dhe zhvillimin personal.
Lista është e hapur për propozime për të gjitha klasat, nga e dyta deri në të nëntën. Është paraparë gjithashtu mundësia për përfshirjen e nga një vepre nga letërsitë kombëtare të të gjitha gjuhëve mësimore,me ç'rast çdo vepër do të përkthehet në të gjitha gjuhët zyrtare të mësimdhënies në Maqedoni.
Formulari për propozim-librin duhet të dërgohet në adresën e mëposhtme: bro.macedonia@bro.gov.mk , më së voni deri më 30 nëntor 2025.