Shkolla e Mesme Shtetërore me Qendër Burimore „Partenija Zografski” në Shkup shënon 70-vjetorin e themelimit, ndërsa në ceremoninë e organizuar me këtë rast fjalim mbajti ministrja e Arsimit dhe Shkencës, Vesna Janevska, me mirënjohje për të gjithë ata që me përkushtimin, dijen dhe dashurinë e tyre kontribuan që kjo shkollë të shndërrohet në shtyllë gjithëpërfshirëse.
Puna juaj pasqyrohet te shumë të rinj me dëmtim në dëgjim të cilët janë rritur duke u bërë qytetarë të pavarur dhe aktivë, plotësisht të integruar në shoqëri. Vazhdojeni misionin tuaj fisnik për t’u ndihmuar fëmijëve të realizojnë dëshirat e tyre, duke mos i parë kufizimet e tyre, por duke i pranuar si të rinj që kanë potencial që duhet zhvilluar. Fëmijët me dëmtim në dëgjim kanë aftësi të arrijnë rezultate të njëjta si të gjithë fëmijët e tjerë”, tha Janevska, duke theksuar rëndësinë e mbështetjes psikosociale në ndërtimin e vetëbesimit te nxënësit se janë të aftë të mësojnë dhe më pas të punojnë njësoj si çdo i ri tjetër.
Në „Partenija Zografski” nxënësit regjistrohen në dy profesione: makineri dhe tekstil, dhe në dy drejtime arsimore: bravandreqës–saldues dhe konfeksioner, gjë që, siç theksoi Janevska, u mundëson të ndërtojnë karrierë profesionale dhe të vlerësohen si anëtarë të barabartë dhe të vlefshëm në kompanitë ku punojnë.
Ministrja rikujtoi rolin që kanë mësimdhënësit dhe shërbimi profesional i shkollës në komunikimin me prindërit e nxënësve me dëmtim në dëgjim, si dhe rolin e gjithë shoqërisë në pranimin e diversiteteve.
“Vetëm përmes përkushtimit të përbashkët, mbështetjes dhe promovimit të vlerave të barazisë dhe respektimit të dallimeve mund të shndërrohemi në shoqëri në të cilën edhe fëmijët me sfida do të ndihen të pranuar dhe të inkurajuar të ndërtojnë pavarësinë dhe kompetencat e tyre”, tha ministrja Janevska.
Ajo theksoi se Ministria e Arsimit dhe Shkencës punon me përkushtim në ndërtimin e arsimit gjithëpërfshirës dhe më cilësor, përmes sigurimit të kuadrit të trajnuar, burimeve materiale-teknike dhe mjeteve ndihmëse të posaçme. Së bashku me Byron e Zhvillimit të Arsimit, përgatisin programe mësimore në të cilat janë të integruara standarde bashkëkohore, praktika të bazuara në shkencë dhe qasje pedagogjike inovative, me qëllim që çdo fëmijë të marrë arsim cilësor dhe gjithëpërfshirës.
Të mos harrojmë se jubileu flet për praktikë të gjatë dhe të frytshme edukative, me të cilën si shtet jemi krenarë. “Partenija Zografski”, me 70 vitet, është dëshmi se përmes arsimit ndërtohet e ardhmja e individit dhe e shtetit në tërësi, ndërsa detyra juaj është ta vazhdoni këtë rrugë në shërbim të fëmijëve tanë”, përfundoi Janevska.
Në ceremoninë solemne u drejtua edhe drejtorja e SHMSHQB „ Partenija Zografski”, Sllobodanka Xhepovska.