Arsimi është përgjegjësi e përbashkët shoqërore. Ministria e Arsimit dhe Shkencës nuk mund të krijojë në mënyrë të pavarur politika arsimore efektive dhe afatgjata nëse ato nuk burojnë nga nevojat dhe sfidat reale të identifikuara që i theksojnë faktorët shoqërorë. Në këtë kuptim, veçanërisht i rëndësishëm është roli i komunitetit të biznesit, i cili i njeh më së miri kërkesat dinamike të tregut të punës dhe nevojën për njohuri dhe aftësi praktikisht të zbatueshme.
Këtë e theksoi ministrja e Arsimit dhe Shkencës, Prof.Dr. Vesna Janevska, në konferencën e sotme me temë “Ndërtimi i së ardhmes-aftësi praktike për gjeneratën e re”, organizuar nga Oda Ekonomike e Maqedonisë së bashku me Ambasadën e Zvicrës në Shkup, në kuadër të projektit “Arsim për punësim në Maqedoni”.
“MASh ka vendosur dialog jashtëzakonisht konstruktiv dhe të hapur me Odën Ekonomike të Maqedonisë dhe me Ambasadën e Zvicrës, e cila ndër vite ka qenë vazhdimisht mbështetëse e fortë në ndërtimin e sistemit arsimor bashkëkohorë, cilësor dhe gjithëpërfshirës.” Së bashku jemi të orientuar drejt zhvillimit të aftësive praktike cilësore te gjeneratat e reja, dhe modeli i arsimit dual është dëshmuar si mekanizmi më i mirë përmes të cilit e realizojmë këtë qëllim. Sot, rreth 700 kompani janë të përfshira aktivisht në ofrimin e mësimit praktik për nxënësit, dhe do të theksoj se-arsimi profesional është pika e fortë e sistemit tonë arsimor”, theksoi Janevska.
Ministrja informoi se mbi 70% e nxënësve të dy gjeneratave të fundit që regjistrohen në arsimin e mesëm, zgjedhin të mësojnë në shkolla të mesme profesionale dhe në shtatë qendrat rajonale për arsim dhe trajnime profesionale, ku përgatiten mirë për përfshirje të shpejtë dhe të suksesshme në tregun e punës, por gjithashtu fitojnë bazë cilësore për avancim të mëtejshëm akademik.
“Nuk kam dyshim se do të arrijmë ta sinkronizojmë plotësisht sistemin arsimor me nevojat e të rinjve, të ekonomisë dhe të gjithë shoqërisë. Por jemi të vetëdijshëm se kjo kërkon kohë. Prandaj, kërkoj që mbështetja e komunitetit të biznesit dhe e partnerëve tanë ndërkombëtarë të vazhdojë. Të ruajmë bashkëpunimin dhe të ofrojmë më tej politika dhe zgjidhje të përbashkëta dhe të qëndrueshme në arsim,” shtoi Janeeska.
Në konferencë fjalim mbajtën edhe zëvendës shefi i msionit Zviceran, Mihal Harari, dhe drejtori ekzekutiv i Odës Ekonomike të Maqedonisë, Antoni Peshev, pas së cilës u zhvilluan disa diskutime në panel lidhur me përgatitjen e të rinjve për përfshirje në sektorin e biznesit.