Janevska: Dikur dhe sot, ekziston diçka e përbashkët në sistemin arsimor – magjia që e krijon mësimdhënësi
Në kuadër të fushatës “Magjia është në dijen”, Tetova ishte nikoqire e panel-diskutimit “Çfarë magjie fshihet pas një pese – e kaluara dhe e tashmja në duel”.
Për mënyrën se si ndër vite është ndryshuar sistemi arsimor dhe domethënia e notave, u diskutua në panelin e tretë të fushatës kombëtare “Magjia është në dijen” të Ministrisë së Arsimit dhe Shkencës. Ngjarja u mbajt në Tetovë, me temë “Çfarë magjie fshihet pas një pese – e kaluara dhe e tashmja në duel”.
Panel-diskutimi hapi çështjet se si ka ndryshuar procesi i arsimit dhe i vlerësimit ndër breza, çfarë do të thotë suksesi sot dhe cili është roli i mësimdhënësit në botë ku teknologjia mund të shpjegojë gjithçka, por jo gjithmonë të frymëzojë.
Ministrja e Arsimit dhe Shkencës, prof. dr. Vesna Janevska, në fjalimin e saj theksoi se magjia e profesionit të mësimdhënësit qëndron në humanitetin, në kontaktin dhe mirëkuptimin që asnjë pajisje nuk mund t’i zëvendësojë. Në të kaluarën, mësimi – theksoi Janevska – ishte proces i durueshëm i shkrimit dhe të mbajturit mend, ndërsa sot mësimi është edhe përzgjedhje, analizë dhe krijim i ideve të reja që çojnë drejt suksesit personal dhe kontribuojnë në zhvillimin e vendit.
„Por, në të dy kohërat ekziston diçka e përbashkët – ajo është magjia që e krijon mësimdhënësi, që e shndërron kureshtjen në dije dhe numrat në histori njerëzore. Sot, nxënësit kanë qasje në miliona informacione, por vlera e vërtetë e mësimdhënësit është se di t’i shndërrojë ato informacione në dije, në mirëkuptim dhe në kureshtje. Mësuesi nuk mban mantel, por krijon magji – magjinë e të mësuarit që e ndryshon të ardhmen“, shtoi ministrja.
Milka Trimçevska, drejtore e Byrosë për Zhvillimin e Arsimit, theksoi se magjia pas suksesit të nxënësve gjithmonë fillon me mësimdhënësin, ndërsa Byroja është këtu për ta mbështetur atë magji përmes zhvillimit të vazhdueshëm profesional dhe mbështetjes mentoruese për mësimdhënësit.
Në panel, përvojat dhe mendimet e tyre i ndanë edhe Daniella Apostollovska, mësimdhënës i grupit klasor dhe ndihmësdrejtor në SHFK “Bratstvo – Migjeni” nga Tetova, Sihana Kaba Kasami, mësim-dhënës i grupit klasor dhe drejtor në SHFK “Kirili dhe Metodi” të Tetovës, si dhe Salih Mislimi, doktor i mjekësisë së përgjithshme dhe profesor i lëndëve profesionale në SHMKM “Nikolla Shtejn” – Tetovë.
Ata, përmes shembujve personal, bënë paralele midis kohës kur nxënësit mësonin nga librat dhe kohës së sotme, kur në disa raste mësimi dhe ligjërimi bëhen përmes pajisjeve digjitale. U pajtuan se teknologjia është ndihmës, por jo zëvendësim për mësimdhënësin. Theksuan se pas çdo “pese” qëndron histori për përpjekje, inkurajim dhe besim, se suksesi i vërtetë është kur nxënësi dëshiron të mësojë, ndërsa mësimdhënësi është ai që ndez kureshtjen. Të gjithë ishin të njëzëri se teknologjia mund të ndihmojë, por vetëm njeriu mund të frymëzojë.
Diskutimi i sotëm në panel rikujtoi se magjia e vërtetë e arsimit nuk qëndron në shpejtësinë e qasjes në informacion, por në aftësinë për ta kuptuar, ndjerë dhe zbatuar dijen. Edhe pse kohët ndryshojnë, mësimdhënësit vazhdojnë të jenë ata që e shndërrojnë kureshtjen në urtësi ndërsa “pesa” në diçka shumë më tepër se një numër.
Paneli u realizua në kuadër të fushatës kombëtare “Magjia është në dijen”, e cila i kushtohet njohjes dhe mbështetjes së profesionit të mësimdhënësit si forcë lëvizëse e përparimit shoqëror. Përmes një sërë ngjarjesh dhe aktivitetesh, fushata i afirmon mësimdhënësit si krijues të vërtetë të ndryshimeve, ata që e shndërrojnë kureshtjen në dije dhe dijen në themel për një të ardhme më të ndritur të shoqërisë.