Rezultatet e dobëta në lidhje me të kuptuarit e leximit dhe shkrim-leximin matematikor që i tregojnë nxënësit tanë në testet ndërkombëtare si PISA dhe TIMSS janë arsyeja për ndryshimet e mëdha që i filluam para një viti e gjysmë dhe do të vazhdojnë derisa ta përmirësojmë ndjeshëm sistemin arsimor. Jemi të fokusuar në optimizimin e rrjetit shkollor dhe përmirësimin e kushteve të infrastrukturës, por edhe në futjen e mësimdhënies me një turn të vetëm dhe qëndrimeve të zgjatura në shkollë, sepse fëmijët tanë nën moshën 15 vjeç kalojnë 900 orë më pak në shkollë krahasuar me bashkëmoshatarët e tyre në Evropë. Për mësimdhënësit e grupeve klasore nga viti i ardhshëm do të ketë trajnim të detyrueshëm për lexim me kuptim.
Këtë e theksoi ministrja e Arsimit dhe Shkencës Prof.Dr.Vesna Janevska, duke iu përgjigjur një pyetjeje parlamentare të cilat Ministria po i ndërmerr për të përmirësuar cilësinë e arsimit, gjë që reflektohet në arritjet e ulëta të nxënësve në testimet ndërkombëtare.
“Po zbatojmë politika që janë krijuar së bashku me shumë ekspertë vendas dhe të huaj që punojnë në fushën e arsimit, por edhe me mësimdhënësit, të cilët, nga ana tjetër, motivohen që të jenë kreativë dhe të lirë në planifikimin e mësimdhënies, me qëllim që ajo të jetë interesante për nxënësit dhe efektive. Kemi vazhduar Konceptin e vjetër për arsimin fillor, por me ndryshime që do të ndikojnë në njohuritë e nxënësve”, tha Janevska.
Ajo theksoi se një pikë e fortë e sistemit kombëtar të arsimit është arsimi profesional. Gjatë dy viteve të fundit, rreth 17 mijë nxënës janë regjistruar në arsimin e mesëm, nga të cilët 12 mijë ose 70 përqind janë në shkolla profesionale.
“Kemi rreth 4 mijë nxënës në paralele duale në të cilat trajnimi praktik kryhet nga 700 kompani, më së shumti deri më tani. Vizitova disa nga kompanitë dhe ata janë të kënaqur me njohuritë që posedojnë fëmijët. Prandaj, do të vazhdojmë të zhvillojmë konceptin e arsimit dual së bashku me komunitetin e biznesit dhe me disa partnerë tanë, përfshirë ambasadat e Zvicrës, Gjermanisë, Austrisë dhe Suedisë”, potencoi Janevska, duke rikujtuar se deri më tani në vend janë themeluar shtatë qendra rajonale për arsim dhe trajnim profesional, ndërsa e teta do të themelohet vitin e ardhshëm kalendarik.