Punëtorët e arsimit këtë muaj do të marrin pagë më të lartë për 5 për qind, e cila është rezultat i marrëveshjes së Qeverisë dhe SASHK-ut për rritjen e vazhdueshme të të ardhurave të tyre në 4 vitet e ardhshme në një shumë që do të varet nga niveli i inflacionit, theksoi ministrja e Arsimit dhe Shkencës Prof.Dr. Vesna Janevska në Kuvend, duke iu përgjigjur pyetjes së deputetes Jovanka Trençevska.

„ Kemi arritur marrëveshje për ngritjen e pagave këtë vit, konform mundësive të krijuara në buxhet. Nëse nuk do të ishin detyrimet e prapambetura nga qeveria e mëparshme, rritja do të ishte më e lartë. Por fatkeqësisht për pagesën e pagave të punëtorëve në arsimin e lartë kanë munguar 1.5 miliardë denarë. Për pagesën e pagave në arsimin fillor dhe të mesëm kanë munguar 900 milionë denarë dhe është dashur t’i sigurojmë me prioritet”, tha Janevska, duke shtuar se nuk janë paguar as shumë të drejta në sferën e standardit të nxënësve dhe studen-tëve.

Ministrja shtoi se mësimdhënësit janë të kënaqur që në muajin shkurt do të nënshkruhet marrëveshje sipas së cilës pagat e tyre do të garantohen të rriten çdo vit, në varësi të inflacionit.

 

„Mësimdhënësit janë të kënaqur me qëndrimin e Qeverisë së re. E kaluara është trajtuar si qeveri në pushtet, ndërsa e tanishmja si qeveri me mandat për të punuar, për të bashkëpunuar dhe për të arritur rezultate”, u përgjigj ministrja Janevska, duke shtuar se në katër muajt e kaluar nuk ka pasur grevë nga mësimdhënësit, por vetëm një tentativë e LSDM-së për grevë në emër të tyre, duke mbledhur rreth 50 anëtarë partiakë para MASH-it , të udhëhequr nga lideri i tyre.