Ambasada e Zvicrës në Shkup njofton se Komisioni Federal për bursa për studentë të huaj i Qeverisë së Zvicrës do të ndajë 10-15 bursa për studentë nga vendet e Evropës Qendrore dhe Lindore dhe nga Kaukazi për vitin akademik 2025-2026. Bursat janë të destinuara për studentë të rinj, të diplomuar me kualifikim të lartë nga të gjitha fushat, me mundësi për të vazhduar shkollimin e tyre në studimet e doktoratës dhe post-doktoratës në disa nga universitetet shtetërore ose institucionet e njohura në Zvicër (Universitetet Kantonale Zvicerane, Universitetet e Shkencave të Aplikuara, në dy institutet federale të teknologjisë si dhe katër institutet kërkimore).
Në dispozicion janë tre lloje bursash:
- Bursa kërkimore;
- Bursa të doktoratës
- Bursa të post-doktoratës.
Oferta nuk përfshin bursa për studime deridiplomike dhe të magjistraturës.
Informatat më të detajuara për tri llojet e bursave, të vlefshme për studentët maqedonas, mund t`i gjeni në linkun e Ambasadës së Zvicrës www.eda.admin.ch/north-macedonia .
Aplikimet dhe dokumentet e tjera të nevojshme mund të merren në Ambasadë ose në mënyrë elektronike (tel: 02 3103300 ; e-mail: skopje@eda.admin.ch).
Aplikacionin e plotësuar në letër, kandidatët duhet ta dorëzojnë në dy ekzemplarë (1 origjinal dhe 1 kopje) në Ambasadën e Zvicrës në Shkup, më së voni deri më 10 nëntor 2024.