Sistemi arsimor është në proces reformash thelbësore, të cilat mund t`i realizojmë me sukses vetëm me përpjekjet e të gjithë aktorëve. Sfidat janë të shumta, por angazhimi i përbashkët çon në arritjen e arsimit cilësor, që është prioriteti ynë, tha ministri i Arsimit dhe Shkencës Jeton Shaqiri në takimin e sotëm me zëvendësministrin e ri të Arsimit dhe Shkencës Agim Nuhiu.

Ministri dhe zëvendësi ranë dakord se modernizimi i sistemit arsimor në përputhje me trendet evropiane nuk ka alternativë, sepse ndërtimi i burimeve njerëzore të gatshme për sfidat e shekullit të 21-të është faktori bazë për përparimin e shoqërisë.

Zëvendësministri Nuhiu theksoi se është i përfshirë në krijimin e një sistemi arsimor që do t`u mundësojë fëmijëve dhe të rinjve të fitojnë njohuri, aftësi dhe shkathtësi që do të sigurojnë një të ardhme të suksesshme për ta dhe për shoqërinë në tërësi.